ਚੌਪਈ ॥

चौपई ॥

गौरिपाल इक सुना नरेसा ॥

मानत आनि सकल तिह देसा ॥

गौरा देई नारि तिह सोहै ॥

गौरावती नगर तिह को है ॥१॥

ता की त्रिया नीच सेती रति ॥

भली बुरी जानत न मूड़ मति ॥

इक दिन भेद भूप लखि लयो ॥

त्रासित जारु तुरतु भजि गयो ॥२॥

गौरा दे इक चरित बनायो ॥

लिखा एक लिखि तहा पठायो ॥

इक राजा की जान सुरीता ॥

सो ता कौ ठहरायो मीता ॥३॥

तिसु मुख ते लिखि लिखा पठाई ॥

जहा हुते अपने सुखदाई ॥

को दिन रमत ईहा ते रहना ॥

दै करि पठिवहु हमरा लहना ॥४॥

सो पत्री न्रिप के कर आई ॥

जानी मोरि सुरीति पठाई ॥

जड़ निजु त्रिय को भेद न पायो ॥

नेह त्याग तिह साथ गवायो ॥५॥

सुघर हुतौ तौ भेव पछानत ॥

त्रिय की घात सति करि जानत ॥

मूड़ राव कछु क्रिया न जानी ॥

इह बिधि मूंड मूंडि गी रानी ॥६॥

इति स्री चरित्र पख्याने त्रिया चरित्रे मंत्री भूप संबादे तीन सौ अठतालीस चरित्र समापतम सतु सुभम सतु ॥३४८॥६४४९॥अफजूं॥