ਚੌਪਈ ॥

चौपई ॥

अनदावती नगर इक सुना ॥

आनद सैन न्रिपति बहु गुना ॥

अनदावती सदन तिह बाला ॥

जगत भयो ता ते उजियाला ॥१॥

अधिक रूप बिधिना तिह कीना ॥

जा सम रूप न दूसर दीना ॥

आयो पुरख एक तब बनो ॥

रानी ते सुंदरि थो घनो ॥२॥

जब अबला तिह रूप निहारा ॥

मदन बान ता के तन मारा ॥

रीझि रही सुंदरि मन माही ॥

घर बाहर की कछु सुधि नाही ॥३॥

पठै हितू इक ताहि बुलावा ॥

काम भोग तिह साथ कमावा ॥

मन मानत आसन तिह दए ॥

चुंबन और अलिंगन लए ॥४॥

अधिक मित्र रानी कह भायो ॥

इह बिधि ताहि प्रबोध जनायो ॥

कहा उजारि जहा बड अही ॥

आसन लाइ बैठियो तही ॥५॥

सभ ही अंग बिभूति चड़ैयहु ॥

द्रुम तर बैठे ध्यान लगैयहु ॥

राजा सहित तहा हम ऐहैं ॥

तुमै धाम ज्यों त्यों लै जैहैं ॥६॥

मानि जार सोई बच लयो ॥

भेख अतिथ को धारत भयो ॥

आसन एक ब्रिछ तर मारा ॥

यौ राजा सौ नारि उचारा ॥७॥

सोवत हुती सुपन मै पायो ॥

महा रुद्र मेरे ग्रिह आयो ॥

पाव साथ तिन मोहि जगायो ॥

अधिक क्रिपा करि बचन सुनायो ॥८॥

तुम राजा जू साथ उचरियहु ॥

एक बात चित भीतरि धरियहु ॥

एक रखीसुर बन महि सुना ॥

ता सम भयो न है कहूं मुना ॥९॥

राजा सहित जाइ तिह ल्रयैयहु ॥

द्वादस बरख संग लै स्वैयहु ॥

निहसंसै घर मै सुत होई ॥

या मै बात न दूजी कोई ॥१०॥

महा जती तिह मुनि को जानहु ॥

कहूं न बिनसा ताहि पछानहु ॥

रंभादिक इसत्री पचि हारी ॥

ब्रत ते टरा न रिखि ब्रत धारी ॥११॥

हम तुम साथ तहा दोऊ जावैं ॥

ज्यों त्यों मुनहि पाइ पर ल्यावैं ॥

बारह बरिस मोरि संग स्वावहु ॥

निहसंसै घर मै सुत पावहु ॥१२॥

सुनि बच न्रिप उठि ठाढो भयो ॥

रानी सहित तवन बन गयो ॥

जह छ्वै ब्रिछ गगन तन रहे ॥

घोर भयानक जात न कहे ॥१३॥

रानी सहित राव तह गयो ॥

हेरत तवन मुनीसहि भयो ॥

नारि सहित पाइन तिह परियो ॥

चित मै इहै बिचार बिचारियो ॥१४॥

जो सिव सुपन समै कहि गयो ॥

सो हम साचु द्रिगन लहि लयो ॥

ज्यों त्यों करि इह ग्रिह लै जाऊां ॥

लै रानी के साथ सुवाऊां ॥१५॥

ज्यों ज्यों न्रिप पाइन पर परै ॥

त्यों त्यों मुनि आंखै न उघरै ॥

त्यों राजा सीसहि निहुरावै ॥

ता कह महा मुनी ठहरावै ॥१६॥

जब न्रिप अनिक बार पग परा ॥

तब आंखै मुनि दुहूं उघरा ॥

ता सौ कहा किह नमिति आयो ॥

किह कारन इसत्री संग ल्यायो ॥१७॥

हम है मुनि कानन के बासी ॥

एक नाम जानत अबिनासी ॥

राजा प्रजा बसत किह ठौरा ॥

हम प्रभ के राचे रस बौरा ॥१८॥

यह संपति हमरे किह काजा ॥

जो लै हमै दिखावत राजा ॥

हम नहि धाम किसू के जाही ॥

बन ही महि हरि ध्यान लगाही ॥१९॥

क्रिपा करहु न्रिप धाम पधारो ॥

हमरे बडे अघन कह टारो ॥

बारह बरिस क्रिपा करि रहियै ॥

बहुरो मग बन ही को गहियै ॥२०॥

जब न्रिप अधिक निहोरा कियो ॥

तब इह बिधि उतरि रिखि दियो ॥

हमरो कहा धाम तव काजा ॥

बार बार पकरत पग राजा ॥२१॥

हम कह सिव तुहि आपु बतायो ॥

सोवत इहा जगाइ पठायो ॥

ता ते मानि संभु को कहो ॥

बारह बरख हमारो रहो ॥२२॥

सिव की सुनत भयो जब बानी ॥

तब मुनि साथ चलन की मानी ॥

राजा के ह्वै संग सिधारा ॥

रानी सहित सदन पग धारा ॥२३॥

खान पान आगै न्रिप धरा ॥

ताहि निरखि रिखि ऐस उचरा ॥

इह भोजन हमरे किह काजा ॥

ए है इन ग्रिहसतन के साजा ॥२४॥

हम इसत्रिन तन नैन न लावहि ॥

इन रस कसन भूल नहि खावहि ॥

बिन हरि नाम काम नहि आवै ॥

बेद कतेब यौ भेद बतावै ॥२५॥

तब न्रिप ताहि सही मुनि माना ॥

भेद अभेद न मूड़ पछाना ॥

निजु रानी तन ताहि सुवायो ॥

मूरख अपनो मूंड मुडायो ॥२६॥

निजु कर मूरख सेज बिछावै ॥

ताहि त्रिया के साथ सुवावै ॥

अधिक जती ता कह पहिचानै ॥

भेद अभेद न मूरख जानै ॥२७॥

जब पति नहि हेरत त्रिय जानै ॥

काम भोग ता सो द्रिड़ ठानै ॥

भाग अफीम अधिक तिह ख्वारी ॥

चारि पहर रति करी प्यारी ॥२८॥

भोग करत इक क्रिया बिचारी ॥

ऊपर एक तुलाई डारी ॥

न्रिप बैठो मूकियै लगावै ॥

सो अंतर रानियहि बजावै ॥२९॥

इह छल सौ मित्रहि तिन पावा ॥

मूरख भूप न भेव जतावा ॥

पावद बैठि मूकियन मारै ॥

उत रानी संग जार बिहारै ॥३०॥

इह छल सौ रानी पति छरियो ॥

जार गवन त्रियि देखत करियो ॥

मूरखि भेद अभेद न पायो ॥

सो इसत्री ते मूंड मुडायो ॥३१॥

इति स्री चरित्र पख्याने त्रिया चरित्रे मंत्री भूप संबादे दोइ सौ चौरानवे चरित्र समापतम सतु सुभम सतु ॥२९४॥५६२०॥अफजूं॥