ਚੌਪਈ ॥

चौपई ॥

पछिमावती नगर इक सोहै ॥

पसचिम सैन न्रिपति तह को है ॥

पसचिम दे रानी ता के घर ॥

रहत पंडिता सकल लोभि करि ॥१॥

अधिक रूप रानी को रहै ॥

जग तिह दुतिय चंद्रमा कहै ॥

ता पर रीझि न्रिपति की भारी ॥

जानत ऊच नीचि पनिहारी ॥२॥

तह हुतो राइ दिलवाली ॥

जानक दूसरासु है माली ॥

सो पहि जात न प्रभा बखानी ॥

उरझि रही दुति हेरत रानी ॥३॥

ता सौ अधिक सनेह बढायो ॥

एक दिवस ग्रिह बोलि पठायो ॥

सो तब ही सुनि बच पह गयो ॥

भेटत राज कुअरि कह भयो ॥४॥

पोसत भाग अफीम मंगाई ॥

एक सेज पर बैठि चड़ाई ॥

जब मद सो मतवारे भए ॥

तब ही सोक बिसरि सभ गए ॥५॥

एक सेज पर बैठि कलोलहि ॥

रस की कथा रसिक मिलि बोलहि ॥

चुंबन और अलिंगन करही ॥

भाति भाति के भोगन भरही ॥६॥

रानी रमत अधिक उरझाई ॥

भोग गए दिलवाली राई ॥

चित अपनै इह भाति बिचारो ॥

मै याही के संग सिधारो ॥७॥

राज पाट मेरे किह काजा ॥

मो कह नही सुहावत राजा ॥

मै साजन के साथ सिधैहौ ॥

भली बुरी सिर माझ सहैहौ ॥८॥

जहा सिंघ मारत बन माही ॥

सुना दोहरा एक तहा ही ॥

चड़ि झंपान तिह ठौर सिधाई ॥

मित्रहि तही सहेट बताई ॥९॥

महा गहिर बन मै जब गई ॥

लघु इछा कह उतरत भई ॥

तह ते गई मित्र के संगा ॥

छित मै डारि स्रोण के रंगा ॥१०॥

जब त्रिय साथ सजन के गई ॥

तब अस सखी पुकारत भई ॥

लए सिंघ रानी कह जाई ॥

कोऊ आनि लेहु छुटकाई ॥११॥

सूरन सिंघ नाम सुनि पायो ॥

त्रसत भए अस करन उचायो ॥

जाइ भेद राजा तन दयो ॥

लै करि सिंघ रानियहि गयो ॥१२॥

न्रिप धुनि सीस बाइ मुख रहा ॥

होनहार भयो होत सु कहा ॥

भेद अभेद कछू नहि पायो ॥

लै रानी कह जार सिधायो ॥१३॥

इति स्री चरित्र पख्याने त्रिया चरित्रे मंत्री भूप संबादे दोइ सौ इक्रयानवो चरित्र समापतम सतु सुभम सतु ॥२९१॥५५४९॥अफजूं॥